சட்டப்பேரவையில் இன்று சமர்ப்பிக்கப்பட்ட 2022-23 நிதிநிலை அறிக்கை மாற்றுத்திறனாளிகளுக்கு பெரிய ஏமாற்றத்தையும் சிறிய வரவேற்பையும் உடையதாக உள்ளது. குறிப்பாக சட்ட உரிமைகளை முன்னெடுக்க தமிழக நிதிநிலை அறிக்கையில் முயற்சிக்காதது வெளிப்படுகிறது. ரூ.838 கோடி ஒதுக்கீடு செய்யப்பட்டுள்ளது. கடந்த ஆண்டைவிட ரூ.25 கோடி மட்டுமே உயர்வு. பொதுக் கட்டிடங்கள், போக்குவரத்துகள் 5 ஆண்டுகளுக்குள் மாற்றுத்திறனாளிகள் பயன்படுத்தும் வகையில் மாற்றியமைக்க வேண்டும் என்பன உள்ளிட்ட 2016 உரிமைகள் சட்ட விதிகளை அமல்படுத்த நிதிநிலை அறிக்கை கண்டுகொள்ளாதது சட்டத்தை அவமதிக்கும் செயலே ஆகும். முதியோர், விதவை, மாற்றுத்திறனாளி உள்ளிட்டோருக்கு வழங்கப்படும் சமூகப்பாதுகாப்பு திட்டத்திற்கு ரூ.4,816 கோடி ஒதுக்கப்பட்டுள்ளது. இது கடந்த ஆண்டைக் காட்டிலும் சுமார் ரூ.8 கோடி மட்டுமே உயர்வு, அண்டை மாநிலங்களில் ரூ.3000 - க்கு மேல் உதவித்தொகை வழங்கப்படும் நிலையில், தமிழகத்திலும் அதற்கு ஈடாக உயர்த்த நிதிநிலை அறிக்கை முயற்சிக்காதது மாற்றுத்திறனாளிகளின் அதிருப்தியையும் வருத்தத்தையும் அதிகரித்துள்ளது. சென்னை கீழ்ப்பாக்கம் அரசு மனநலக் காப்பகத்தை மேம்படுத்த ரூ.40 கோடி ஒதுக்கீடு செய்துள்ளது வரவேற்கத்தக்கது. தனியார் தொண்டுநிறுவன சிறப்புப்பள்ளிகளில் பணியாற்றும் சிறப்பாசிரியர், மறுவாழ்வுப் பயிற்றுனர்களுக்கு மாதத் தொகுப்பூதியம் ரூ.14,000 லிருந்து ரூ.18,000 ஆக உயர்த்துவது வரவேற்கத்தக்கது என்றாலும், ஊதியத்தைப் பணியாளர்களின் வங்கிக் கணக்குகளில் நேரடியாக அரசு செலுத்தவும், இதன் மூலம் தொண்டுநிறுவனங்கள் அதிகாரிகளின் கூட்டு முறைகேடுகளை தடுக்க வேண்டும். தொண்டு நிறுவன திட்டங்களை முறைப்படுத்துக: தொண்டுநிறுவனங்கள் மூலம் செயல்படுத்தப்படும் திட்டங்கள் பெயரளவிற்கும், அதிகாரிகள் ஊழல் செய்வதற்குமான திட்டங்களாகவே உள்ளன. பொருத்தமான ஓய்வுபெற்ற நீதிபதிகள், மனித உரிமை மற்றும் மாற்றுத்திறனாளி உரிமை ஆர்வலர்களைக் கொண்ட குழுக்களை அமைத்து முறையாக ஆராய்ந்து செயல்படுத்த தமிழக அரசு முன்வர வேண்டுமென தமிழ்நாடு அனைத்துவகை மாற்றுத்திறனாளிகள் மற்றும் பாதுகாப்போர் உரிமைகளுக்கான சங்கத்தின் சார்பில் தெரிவித்துக்கொள்கிறோம். *** தமிழ்நாடு அனைத்துவகை மாற்றுத்திறனாளிகள் மற்றும் பாதுகாப்போர் உரிமைகளுக்கான சங்கம் Tamilnadu Association for the Rights of All Types of Differently Abled and Caregivers - TARATDAC “பெரிய ஏமாற்றமும் சிறிய வரவேற்பும் உடைய பட்ஜெட்” டாராட்டாக் அறிக்கை